Grafískt

Hér er nóg að skoða fyrir litla krílið! Allskyns munstur og sterkir litir. Þetta herbergi gæti bara verið alveg eins fram á fullorðinsár, það þarf bara að skipta út rúminu. Mjög skemmtileg hugmynd finnst mér. Ef maður fær ekki fljótt leið á hlutunum gæti bara verið sniðugt að sleppa öllu barna dúlleríinu og velja frekar tímalaus listaverk á veggina og skemmtilegar litasamsetningar.

Myndin er af the Boo and the Boy.

Ólíkir litir

Ég er mjög hrifin af litunum í þessu herbergi, ólíkir litir en tóna vel saman. Þeir Viddi og Bósi eru innblásturinn hér. Bósi ljósár stendur á náttborðinu, það er geimfar (púði) í rúminu og svo er bláa teppið á rúminu með myndum af þeim félögum. Viddi er í heiðurssætinu (á rúminu) og svo eru þarna tveir kúrekahattar, reipi, kúrekastígvél og ýmislegt annað sem tengist þeim Bósa og Vidda. Mér finnst þetta vel heppnað herbergi. Það hefur greinilega verið hugsað út í allt þarna.

Myndin er héðan.

Rúmteppi

Hér eru myndir af nokkrum einföldum rúmteppum og sum þeirra ættu ALLIR að geta gert! Mér finnst afskaplega fallegt og notalegt þegar barnarúm eru með prjónuðum eða hekluðum rúmteppum. Ég þarf greinilega að fara að nýta garn afgangana mína og gera eitthvað svona fallegt. Held að það eina sem skipti máli í svona er að velja litina vel saman. Eins og sést hér til hliðar skiptir það miklu máli. Mér finnst litavalið í gula rúminu passa mjög vel í þetta herbergi.

Myndirnar: Rúmteppið í gula rúminu er héðan, þríhyrningsrúmteppið héðan, röndótta rúmteppið er af Etsy en engin slóð fannst, minna kassarúmteppið er héðan og loks stóra kassarúmteppið héðan.

Textíll

Fallegur textíll getur breytt herbergjum ótrúlega mikið. Þetta barnaherbergi hér til hliðar væri t.d. ekkert spennandi ef gluggatjöldin, rúmfötin og púðarnir væru hvítir. Ákvað að setja neðri myndina með til þess að sýna hvað textíllinn getur líka skapað mikla stemmningu, ég fer amk í sumarskap við að horfa á myndina :) Á báðum myndunum eru efnin frá Marimekko.

Myndirnar eru af tveimur frábærum bloggum: Minor Details og Decor8

Erfðagripur

Þetta er sængurver sem amma ein gerði fyrir barnabarn sitt en þar notaði hún myndir sem annað barnabarn hafði teiknað við vísuna. Mér finnst þetta alveg ótrúlega fallegt og vona bara að ég hafi dugnað til þess að gera svona fallegt einn daginn. Kannski bara þegar ég verð amma :) Það væri reyndar gaman að fá Gunnu til að teikna nokkrar teikningar við eitthvað uppáhalds lag og geyma og svo seinna láta Ingibjörn gera líka. Svo get ég gefið þeirra börnum sængurföt með teikningum foreldra sinna :)
Leiðbeiningar og fleiri myndir hér.